Santa Cruz

(ziehet nech mini foettelis vo las vegas ineh u mini 3 posts im luli... das isch alls wo neu isch bis jetz)

nach santa barbara si mr i die naechschti heiligi stadt, santa cruz. da mr nid viel guets ueber santa cruz ghoert hei, hei mr z hostel nume fuer 1 nacht buechet. santa cruz isch wuerklech nuet speziells gsi, eifach es verschlafnigs hippie-staedtli voll vo surfer u abgspacte griller. ueberall gsehsch dudes am kiffe, oder dudes wo um gaeld baettle fuers kiffe. oeppis hei mr aber doch gmacht, es surfermuseum bsuecht. das isch z chlinschte mueseum woni je bseucht ha, es isch imene luechtturm unterbracht gsi. schuesch i aebe nid vil gange, im hostel hani no e typ u lengnau troffe wo z biel i seegymer isch gange u jetz z sant galle studiert. z hostel isch sehr komisch gsi. me het ues gseit, dass es free-food git, was ues natuerlich sehr gfreut haett, waers nid vergammlet u ohni ameise-fleisch... egal, ig ha mi aemu scho riisig uf san francisco gfreut: if your going to san francisco!!!

Santa Barbara

z santa barbara si mr laenger blibe als mir eigentlech planet hei, gsamthaft 5 taeg. mir hei z vil zit zur verfuegig gha u bis nach san francisco nume no 1 zwueschestop iplanet, u dae isch santa cruz gsi. santa barbara isch aber es gmuetlichs oertli gsi, wos nume so vo studaente wimmlet. mache chame doerte aber nid vil. mir hei vil zit am strand verbracht u hei e ussichtsturm bsuecht, wo me usblick uf die ganzi stadt het. vor architektur haer isch santa barbara sehr spanisch, mit rote daecher u wiise hueser.
am naechschte tag hei mr de ou 4 iheimischi studaente kenneglernt, wo ues ufe pokerpartie hei iglade. mir hei um 5$ isatz gspilt, dr duetsch het gwonne u i bi dritt worde u ha mi isatz zruegg bercho. mir hei ou ueber d usa u ihri problem diskutiert u si zum schluss cho dass europa besser isch... ok, ig bi zu daem schluss cho, d amis heis nid so gaern ghoert.
im hostel saelber, wo voll i russischer hand isch gsi, hei mr ou e amerikanerin us michigan troffe. si isch dr inbegriff vor "begrenzte-amitusse-ohne-ahnung-von-der-rest-der-welt" gsi. anstatt ufzzelle was si scho alles gmacht/gseht het, zelli lieber uf was si nonid gmacht/gseht het: si isch nonie mit luet in kontakt cho wo nid us ihrem staat si. ihres dorf ligt zmitts ir umgaebig vo de 5 grosse see, si isch no a keim gsi. u dr absolut hammer: si het zum erschte mou i ihrem laebe ihres dorf verlah! bi ihrem 20 taegige ufenthalt z santa barbara isch si sicher staendig unter adrenalin gstande...

L.A. / Hermosa Beach

nidergschlage u usglougt nach las vegas hei mir ues ufe waeg zruegg nach helL-A gmacht, gnauer gseit uf hermosa beach. hermosa beach isch e riiche enklave, wenn dr d tv-saendig oc california kennet, de choeit dr nech oeppe vorstelle wies doerte usgseht. vil mache chame z hermosa nid, usser surfe, d waelle hei aber chum d hoechi vore staegestuefe erreicht. am sonntig hei mir e tagestrip uf santa monica, gnauer gseit venice beach, gmacht. was doerte abgeit isch schlimm. ueberall gsehsch abgfuckti luet, hippies, penners, ballers usem ghetto, schwarzenegger kopie wo am muscle beach am pumpe si u viel rollschuehfahrer u skater. Me chomt sech vor wie ire andere waelt. aber das isch typisch fuer amerika, do chomsch innert minute gehdistanz vo eim extreme iz andere... vo usse meint me, dass doerte anarchie herrscht, daem isch aber nid so. ou doerte isch d polizei ume, u mir si sogar ougezuege gsi, wie e gruppe hippies wo am strand kiffet het vo de cops usgno isch worde. fuer e churze ougeblick hani gmeint, dass mir wuerklech im land vo de unbegraenzte moeglichkeite si, d realitaet het ues aber zeigt, dass ou hie d freiheit ihri graenzene het.
nach 3 taeg helL-A hani gnueg gha vor gfackte sunshine-state-metropole. mir hei entschide uf santa barbara z goh. fuer zum busbahnhof het ues aber no e 2h metro fahrt mitts duer wohl schlimmschte ghetto vo de usa erwartet. jetz chani saege: i survived compton! doerte gsehts wirklich duester us. jedes, wuerklech jedes, gelaende gseht us wie es gfaengniss. alles isch umzuent u a vilne zuen vo de bessere firme gsehsch kameras, u wissi gsehsch natuerlich keini, mir si die einzige gsi... problem hei mr keini bercho, mir si sicher zum bus cho u hei ues aendlech ufe waeg gmacht

Viva Las Vegas

hello!
nachdaem ig dr duetsch us fehrman z hollywood troffe ha hei mir ues gmeinsam ufe waeg nach las vegas gmacht. d gambling-hoelle schlechthin. uebernachtet hei mir im sin city hostel... dr name seit jo scho alles ;) dr erscht tag si mr eifach nume umegloffe u hei dr strip, d strass a daem all beruehmte casinos si, besichtigt. u da las vegas mitts ir wuesti isch, ischs verdammt heiss gsi. drum hei mr nachere abchuelig gsuecht. i uesem hostel hets keis swimmingpool gha, derfuer hets jo gnueg anderi 4-5 staerne hotels ume. do si mr eifach stinkfraech iz naechscht beste hotel spaziert, richtig swimmingpool, si doerte a de badmeister verbigloffe u heis ues gmuetlich gmacht :) viva gratis bade! a propos gratis... im hotel mirage hei mr ou gratis e delphin-show agluegt wo eigentlech 15$ choschtet haett... dr zun isch keis hindernis gsi fuer ues :)
jetz meh zu de casinos. entweder me gamblet bis zum geht nicht mehr u verlochet abartig viel gaeld, oder me machts uf d backpacker art u profitiert vo de casinos. mir hei luet gseh wo i 5minute hunderti vo dollar hei verspilt. mir heis so gmacht dass mir a ne 1$ outomat si gange u um 1 cent isaetz hei gspilt... do chasch locker e stund am outomat verbringe, maengisch gwinnsch u maengisch verluersch, aber z geile dranne isch, dass de gratis z trinke berchomsch. e serviertochter chont regumaessig verbi u frogt ob de oeppis z trinke wosch, me berchomt alles, bier, long islands, bacardi-cola. das heisst wenn de glueck hesch gisch a eim obe 2-3$ a de outomate us u betrinksch di doerte :) ps. i de casinos hets kei uhre u kei faenschter, das heisst du hesch voll kei plan was fuer ziet dass isch, u da d casinos nie zue hei wirsch ou nie usegschosse...
ig ha mr e limite vo 50$ gsetzt zum vergamble u die hani ou ighalte... natuerlich hani alles verlore. blackjack hani paech gha, roulette isch ou nid grad mis spil gsi... u poker waer z tuer gsi drum hanis grad gloh.
mir hei ou voll cooli luet im hostel kenneglernt, e schwitzer us basu, hollaender u e duetsche. mit dene si mr ou am meischte unterwaegs gsi.
dr letsch obe isch geil aber ou scheisse gsi fuer mi. z hostel het e limousine-tour organisert u da si fasch all mitgange. ig ha mis zuegs im zimmer gloh, inkl. mim gaeld (ig bi am gliche tag 400$ ir bank go abhaebe) u bi mim paech het mir oepper 300$ usem rucksack chlauet.
das isch auso las vegas gsi, sin city pur, wos kei regle git, u kei moral u kei sitte herrscht. ueberall gsehsch puffs, drive-thru-wedding-chappels, dealer u bsoffni tourischte.
fazit: viva las vegas

Los Angeles, Hollywood

hi all
so mi 2t stop z kalifornie isch los angeles, gnauer gseit hollywood gsi. hie isches scho es paar grad waermer. die stadt isch so abartig gross dass es stunde brucht mitem bus vo eim ort zum andere z cho, drum hani mi uf d umgaebig vo hollywood konzentriert. z hostel wo ni bi gsi isch cool gsi, usa hostel (www.myspace.com/jokehead) die hei doert 2 mol ir woche sone comedy-night, dr link obe isch es bispil wies doerte abgeit :)
z hostel het ou no e hummerlimo-tour organisiert, wo ig natuerlich ha muese derbi si... do si 18 luet vom hostel im hummer duer d stadt gfahre u dr luxus lo usehaenge, ps. es het no gratis champagner gaeh, all-you-can-drink natuerlich :)
schuesch bini halt wider viil umegloffe. z beverly hills bini gsi, am beruehmte rodeo drive wos nume laede wie gucci, d&g, versace usw git u die riiche u schoene ichoufe. beruehmts hani leider niemert gseh. naer bini ou no id ville gaegend go umeschlendere u ha d playboy-mansion vom hugh hefner ufgsuecht... gseh hani aber nuet, isch alles hinter buesch u zuen versteckt :(
am letschte tag vo mim hollywood ufenthalt, sonntig 3 juli, si grad d mtv movie awards im universal studio z hollywood gsi... das hani mir uf kei fall woelle la entgoh u ha mi ufe waeg gmacht zur party, inecho bini natuerlich nid derfuer hani dr borat gseh wi ner d party verloht u i sini limo stigt.
ansonste isch los angeles, hollywood, nuet speziells. ig ha mr alles chlei schoener vorgstellt. dr walk of fame, aso doert wo all staerne vo de beruehmtheite si, isch draeckick u stink u es hange komischi luet umenand. dr sunset strip, doert wo die beruehmte clubs, bars u restaurants si isch ou beschisse. fuere ganz sunset strip bruchsch oeppe e stund z loufe, u i dere stund hani genau oeppe 10 persone chruezt, derfuer si d strosse voll vo outos. z LA louft drum kei sou, all fahre outo.
z LA hani naer ou e duetsche kenneglernt, mit daem reisi jetz bis aends monet d westchueschte entlang bis nach san francisco.

San Diego / Tijuana, Mexico

Whats up switzerland?
sorry dass i so lang nuet inegschribe ha, isch drum nid eifach gsi do hie z kalifornie gratis internet z finde (ps. mir si im geburtsort vom internet...)
so mi erscht stop z kalifornie isch san diego gsi, z erschte wo mr hie ufgfalle isch isch, dass es verdammt chalt isch... ha no am flughafe d jacke muese usehole :( ca. 16grad gsi. z san diego bini 4 taeg z downtown verbracht u 2 taeg am strand. downtown isch nuet speziells derfuer isch dr strand umso geiler... zum glueck hani mit dr corrine, kollegin vo biel wo z san diego sprachschuel macht, kontakt choenne ufnaeh u si und ihri kollegin hei mir fasch all straend vor umgaebig zeigt. dr strand a daen ig 2 taeg ha verbracht het ou no grad e surfcontest stattgfunde. komisch isch gsi dass nume die "wisse" am surfe si gsi... das heisst all iwanderer, mexicaner, si am pier am fische gsi, u das si nid grad wenig gsi, oeppe gaege die hundert.
krass isch no gsi dass es nazis gha het am strand wo e hippie zaemegschlage hei... dr eint mitemne riise hackechruez ufem ruecke isch voll bsoffe gsi u het sech nuemme under kontrolle gha :( naja si halt dummi luet mitere hohle birre wo nume choei hasse...
ansonste hani nid vil gmacht, umegloffe, isch scho anders weme elei am umereise isch als z zwoeit...














tijuana mexico
z hostel i daem i bi gsi het ou e tagestrip uf tijuana mexico organisiert, do hani natuerlich nid choenne faehle... vili hei mr dervo abgrate, aber ig has muese gseh. uf mexico z cho bruchsch mitem traemmli oeppe e halb stund vo san diego u es isch oeppe z eifachschte uf dr waelt, kei kontrolle nuet, nume es tor hei mr muese passiere. keini 5 minute z tijuana hets mi scho agschisse. jede wot dr oeppis adraeie, si packe di fasch am arm u wei di i lade ziehe damit de ihre ramsch aluegsch u choufsch... mir si aebe nume iz tourischte-tijauna, es git no es downtown, doert wo di iheimische laebe, doert si mr aber nid haere. naer isch z aesse agseit gsi, do hani gmeint, dass i fuer wenig gaeld vil cha aesse... z gaegeteil isch dr fall gsi. fuer e taeller mit wenig druffe u es cola hani 13$ zahlt!! meh als ig i mim ganze usa-trip fuers aesse ha usgaeh!!! do hets mr ganz abgloesche u ig ha numeno zruegg woelle. das isch aber nid so schnaell gange, wil all die illegale iwanderer ar graenze agstande si ;)
fazit vo mim trip: es het sech nid glohnt!!

Miami, South Beach

whats poppin` switzerland!?!?

wie scho atoent isch letscht woche miami beach agseit gsi. heimat vom el grande scarface, vom art deco oceandrive, lowriders, latinos, strand, party u schoene froue... Am erschte tag z miami hei mr am strand e kubaner, dr umberto, kenneglernt. mit ihm si mr ou am obe eis go zie ine schwule-bar (zu uesere entschuldigung: das isch die einzigi bar gsi wo am sonntig obe um die zit no offe het gha, mir si eifach dusse ghocket u hei de schwule zuegluegt wie si dinneh bim karaoke si abgange hehe). dr umberto het ues no verzellt dass er am vorobe 2 schwitzer hockey spiler het kenneglernt, nach langem umeraetsle hei mr usegfunde dass dr eint dr ronny rueger isch gsi, ex lugano goalie.

z erschte hostel wo mr uebernachtet hei isch chlei tuer gsi u deswaege si mir naer iz jazz-hostel gwaechslet. das isch e sehr guete entscheid gsi, wils eifach es geils hostel isch. am obe hocke all hostelbewohner dusseh u mir hei super neui luet kenneglernt. mitemne duetsche wo usgseht wie dr detlef-d-soost, earnie, er studiert z montral film, mit ihm si mr am meiste abghange. naer hets no easy hollaender gha, zwoei 2meter franzose, dr eint taenzer u dr ander basketballspiler, e iheimische choch us puerto rico wo immer zu ues isch cho chille, brasilianerinne wo mir cho-cha-tanze hei bibracht, dr renzo e peruaner wo z miami bueglet, e duetsche wo doert schaffet u wo am d-flame(duetsch rapper) si best kolleg isch, usw...
das hostel isch eigentlech es party hostel, si organisiere jede obe party-toure wo me billiger id clubs cha. a eim obe si mir ine club mitem name the mark, wo mr inecho si hets ues vo de socke ghoue, d disco isch igrichtet gsi wie e schwitzer apres-ski-bar. ueberall schwitzerfahnene, bilder vo skifahrer u ab und zue hei si sogar d schneemaschine agloh u es het fuer es paar minute gschneit :)
amne andere obe si mr iz dek23, e vip-schuppe wo eis bier 8$ choschtet... zu uesem glueck isch naer aber dr strom im ganze block usgfalle u naer hets open-bar gaeh, das heisst all drinks gratis. jaegermeister shots, bacardi colas u coronas si d gurgle abegflosse wie nuet :)

schuesch si mr meistens am strand abghange u hei d sonne gnosse... uf miami downtown si mr ou einisch aber das isch neut speziells gsi... eifach ei riise boustell, oeppe 8 wolchechratzer wo am boue si gsi, sicher drogegaeld wo si so wasche...

miami beach isch ou dr ort wo dr silvan u ig trennti waege si gange, er isch no zu sine bekannte uf north palm beach florida, u i ha dr flug uf san diego gnoh...

das isch mou gnueg fuer huet, i gange jetz californie go gniesse ;)

peace mischu