Montreal, Quebec, Kanada

z montreal acho hanis mir erscht mou im hostel gmuetlich gmacht. die erschte 2 tag hani es ganzes stockwaerch fuer mi elei gha, das isch grad das gsi woni brucht ha, zit fuer mi elei. billig isches ou no gsi, wils imene arbeiterviertu usserhalb vom zaentrum glaege isch. woni naer gnueg ha gha vom gruch nach fruescher farb, z hostel isch neu gstriche gsi, hani mi ufe waeg id innestadt gmacht. wil z waetter scheisse isch gsi bini ines cafe u ha dr ganz nommitag a mim buech glaese. gaege obe bini naer no z internationale jazz festival go aluege, wil i glaese ha, dass e cooli jazz band uftritt (dr bob dylan isch ou uftraette dae haetti gaern gseh, aber 1. bini z spot acho u 2. waers sowieso z tuer gsi...). doerte am hoeckle gloubet dr nid waer dass ig troffe ha. i luege id moenschemasse use u gseh sone typ wo breit usschloht bim loufe... bim gnauere haereluege hanis fasch nid choenne gloube: silvan isch ou z montreal!!!! er isch ou vor churzem hie acho, mitem outo wo er z quebec city chouft het. dae souhund het wuerklech es outo chouft, e schrottchischte, isch aber guenschtig gsi. mir hei entschide, dass mir die naechschte tage zaeme abhaenge u somit het er ou i mis hostel gwaechslet. die naechschte tage hei mr d stadt erkundet u dr silvan het mi i die kulinarischi spezialitaet vo quebec igfuehrt: poutine = pommes mit bratesauce. aesse chames nid wuerklech mit gnuss und usgseh duets wienes schlachtfaeld. egal, houptsach es saettiget.
mitem silvan sine franzoesische kollege, woner ueber z couchsurfing het kenneglernt, si mr ou einisch go aesse u hei ues z fuerwaerch inezoge, wo jedes wocheand im sommer stattfindet. abgseh vom fuerwaerch isch extrem was z montreal alles los isch: z groeschte jazz festival vor waelt, paradene, es dutzend konzaert u schuesch no festli u verastaltige. das isch typisch fuer quebec, die franzoesisch sprachigi region vo kanada, z deheime vo uesem stadtheld: alexandre tremblay. (tremblays triffsch hie tusigi a, ou dr buergermeister vo montreal heist tremblay u tremblay isch ou e biermarke).
nid nume d sprach sondern ou d mentalitaet vo de quebecois isch ganz anders als vom raescht vo kanada, gschwige denn vo de usa. d luet hie si froendlich, hilfsbereit, locker druffe u offe: churz gseit eifach geili sieche! es isch natuerlich ou vo vorteil gsi, dass i franzoesisch ha gredt, gaege die englisch spraechende si si scho chlei negativer igstellt, hei si sech doch vor ca 40 jahr vo kanada woelle trenne u es eigets land, quebec, gruende. bimene referendum het sech z volk aber dergaege entschide, weniger als 1% hei dr unterschied usgmacht.
am letschte tag, wo mi dr silvan zur busbahnhof het woelle fahre, het si schlitte uf halber strecki dr geist ufgaeh (siehe foto) und ig ha doerfe stosse. dr charre isch abgschleppt worde u ir garage hei si dr alternator muese uswaechsle...
am silvan hani no vil spass gwuenscht bi sire witere reis quer duer kanada und ha mi nachtbus nach new york gnoh, wo die letschti station vo mire reis isch, wo i mitem schaevu verbringe.