San Francisco

acho z san fran si mr begruesst worde duer saxophon-klaeng wo sech i de laere strasse widerhallt hei. z waetter isch schlaecht gsi, es het gwindet. di ganzi stimmig isch magisch gsi. die stadt het oeppis asech woni nid cha erklaere. es het mir aemu uf ahib gfalle. ig mues saege, dass san fran mit abstand die besti stadt ar westcoast isch, das heist aber ou, dass mi die andere staedt chlei enttuescht hei, hani doch meh erwartet vo kalifornie. da ig mi flug vo san fran uf chicago fuere 25.06 scho buechet ha, hei mir ganzi 7 taeg zur verfuegig gha. am 2te tag si mr uf alcatraz, di legendaeri gfaengniss insle. doerte hei gaengster wie al 'scarface' capone ihri tage abgsaesse. fluchtversuech hets gaeh aber gschaft hets anschinend niemert. bi 3 haeftlinge wo mou si usbroche, bhouptet me, dass sis lebaendig bis az festland gschafft hei, wiu me ihri lichene nie het gfunde. bewise derfuer het me aber keini gfunde. schuesch hei all fluchtversuech mitem tod gaendet, 1tens wils wit isch bis zum festland, 2tens wiu d stroemig starch isch, u 3tens wiu z wasser verdammt chalt isch. es hei ou luet uf dr insle glaebt, d waerter inkl. frou u chind hei uf dr insle ihri wohnige gha. d chind si sogar doerte ufgwachse... nach einige jahr hei sis aber mese schliesse, wius eifach z tuer isch worde.
am naechschte tag hani mi ufe waeg nach north beach (little italy) gmacht, wo sech ide 50er-60er jahre d beat-poets hei ufghalte. i bi iz vesuvio, es restaurant wo sech kerouac u ginsberg vil hei ufghalte u hei lo inspiriere u i bi am ferlenghetti sini buecherei city-lights go duerstoebere.
natuerlich bini ou mit de beruehmte cable-cars mitgfahre, wo me frei ir luft haenget ar site u me up- u downhill duer ganz frisco cha fahre. uesi nachschti station isch d golden-gate bridge gsi, wo ne geniale idruck hinterloht mit dr skyline vo san fran im hintergrund. do gits nume eis wort derfuer: amazing!!
a uesem letschte tag, sonntig 24.06, het z frisco no e schwuleparade stattgfunde, d pride 2007. dr eike, 2 anderi duetschi und ig hei ues die parade nateuerlich uf kei fall choenne lo entgoh. mir hei kei ahnig gha, was ues wird erwarte. was mir de doerte erlaebt/gseh hei, het ues vo de socke ghoue. die ganzi parade isch ueber 3 stund gange, es het ueber 200 zueg gha, u ca. 1'000'000 bsuecher (dervo 80% schwul oder lesbisch). was doerte fuer luet si umegloffe, eifach unvorstellbar, we mes saelber nid gseh het, chames fasch nid gloube. dei si ganz nackt ir gaegend umegrilled u dei hei ues 4ne ou heissi blicke zuegworfe. teiwis hani mi chlei unwohl gfuehlt, es isch aber nuet passiert, ussert dass mr eine a arsch taetscht het :S schuesch isches eifach ei grossi party gsi. es hei all mitgmacht: polizei, fuerwehr, buergermeister usw...nach dr parade hei sech naer all zum konzaert platz begaeh u si doerte umeghange. doert hei mr ou sone abgraenzte platz mitts im getuemmu gfunde, wo fuer jugendlichi unter 27i zuegaenglich isch. dusse isch gstande dass es free-food git, was mir nid hei woelle gloube, mir si go frage wo dass dr hacke isch: es git keine, du darfsch ineh wenn de gaege gwalt, fuer fride, offe gaegenueber neuem u ufgschlosse gaegenueber anderne bisch. das si mr natuerlich alles gsi u hei gratis choenne aesse u trinke.
das het mr wider zeigt, dass me nid all amis i ei topf cha schiesse. so intollerant u begraenzt dei ou si, findet me ou z andere extreme, offeheit u toleranz, wo me sech ou z europa e schibe dervo cheonnt abschnide.
am naechschte tag hani mi flug nach chicago gno, zum jacek, e bekannte wo mini mueter no us de zite kennt wo si z pole glaebt het. er isch scho sit 15 jahr z chicago u het sech gfreut mi choenne z beherberge.